PHILEMON

Philemon mu nu Asia sor te Colosse wonong ko Kris kari bo. Nu Paul kumik te Kris kari ko aratam (19). Noko ura dungan kariimet ago, mu awuk, nu kumik mel karogo. Se ko ura dungan kari bo, ko nup Onesimus, bare nu mel saki tere nam agi ale, naguram nama wonong biya Rome aratam, ale umu te talipara kawam ningi Paul arigam. Se Paul Jesus ko dugu duap nu maonam se nu ko gomang ningi nunguning aram.

Udagi Onesimus Philemon kote peleruk namurukko se, Paul nu sangukko tam gawa imi batogam, ale tuam, nu giok ale ago nama Philemon tuokko. Paul Philemon iwita maonam, Onesimus nika launuria iwita gemang tui se toko mam. Nup Onesimus mu ko nunguning mu “saonga kari yawara”.

Philemon

Den gira

1Ani Paul, ani Jesus Kristus ko ura kari se ko aga talipaman se bagasam, se nanga bo Timothy ilak, ana ilagala tam gawa imi bataguru ni Philemon kisisan. Ni anananga ura suwan, se anananga bo yawara. 2Se nanga nagoras Apphia, se nanga bo Archippus anananga turan Kristus ko ura ko sail tagiso, se Kris alo suen la nika kawam te biguwusan mu buta tam gawa imi ningarsan.

3Anananga Nainet Kaem, nanga Biya Jesus Kristus ilak, nunga nongomang yawara se nunga nongomang lila ningarmon se te bagaralko.

Paul Philemon ko amilmilakaso

4Aga bo Philemon, ani pempem la ngatangasam mu ani ni ZZZ koko iki se Kaem amilmil tusam. 5Mu awuk, ani saki alo nika balman se ikiem, mu ni anananga Biya Jesus ko gemang ningi nunguning se ni ninguru ko kuesam mu ikiem. Ale betela Kaem ko kariimet suen la nunga kuesam mu ikiem ale ko amilmilasam. 6Nika gemang ningi nunguning te saki alo nunga sangorsam. Se borta ko ani iwita Kaem aru manorsam, nu ka sanguk se kilek ningo bitawasam mu ninguru tala bitarko, umutang te ni marak sokel yawara yawara Kristus nangarso mu ninguru ko ikiko. 7Aga bo, ni Kris suen la nunga kuesam ale nunga sangorsam mu te ni nongomang sokel tusam. Se mu ko ani ninguru amilmilasam ale angamang sokel ago la bagasam.

Paul Onesimus ko den Philemon maonam

8Buta se ani aitak mu mel bo ko ka manikko. Ni ikisam, ani Kristus nup te ni munan diram aguwaya bitarko mu ani sokel ago am ka manikko, bare ani uwutata bitirikko mu me ko kuesam. 9Mu awuk, ani ikisam, ni saki alo gemang nungaruko kari. Se mu ko ani Paul, Jesus Kristus ko ura kari, se umutang ko aitak talipara ningi bagasam tala, wore am ka isaru arigisam. 10Ani aga bo Onesimus ko ka manorsam. Ani imi te talipara kawam ningi baga se Kristus ko dugu duap nu manem se ko gomang ningi nunguning aram. Buta se nu aninga kuriang iwitata. 11Ulengkala nu nika ura yawarakala me ilukaso. Bare aitak mu nu analak nanga ura taukko terong mam. 12Nu aninga angamang motam nunguningkiri, bare aking nikate betesam se namoso.

13Aninga angamang mu nu ewerete agarak baga se, tom ani den gilalong yawara ko talipara kawam ningi am bagirik, mu nu nika kiwim te aninga sangaru se agarak bagurukko. 14Bare ni keta balu mu asele agate peleruk tairuk ale agarak bagurukko. Ani ni uwutata aga sangaruko me ka diruwurekko. Ni keta ka ikia aguwaya bitarko agi, mu te butata la bitarko.

15Aninga ikia te iwita ikisam, Kaem ko gomang butata anikaso agi se, Onesimus naguram ale tom katirta ko ka beteram lagakaso, Kaem nu gurugok se aking nikate peleruk ale tom suen biya nikerak bagurukko. 16Bare nika ura dungan kari ko la me bagurukko, nika bo yawara iwita kerak bagurukko. Ani noko ninguru kuesam. Bare ani ikisam mu ni mu ninguru tala ko kuarkowo, mu awuk, nu nika ura kari, se akingtala Kari Biya Kristus te mu nika launuria yawara tala.

17Buta se ni ani nika bo yawara ko iwita aga ikisam agi mu, ni Onesimus aninga toko iwitata nu toko. 18Se nu ulengkala nika mel bo maguwuram agi, noko nup te ikup bo nikate aniso agi, mu ani ikup mu kutuwurikko. 19Ani agata aga agiting te den imi batagorsam: Ani Paul agata noko ikup aguwaya mu koma kutuwurikko. Bare nika ikup aningate aniso mu ni aninga angimik te Kris ko aratem, bare ani mu ko me balikko.

20Se aga bo, ni Kristus te aninga launuria, se ani mel balsam mu diram bitarko. Kari Biya ko nup te angamang nunguru se amilmilurukko. 21Ani ikisam, ni mel ani ko ka isarsam mu ni bitarkowo, ale ninguru tala bitarko mu ani ko ikisam, ale ko tam gawa imi kisisam.

Den nukum saki

22Se den bo tala. Kuwim bo ani te bagirikko mu nunguru bita se bagerko. Mu awuk, aninga angamang ningi nunguning te ikisam, Kaem nenenga ngatangara koma ningaruk, ale ani aga kutuwu tauk nina nigiting te aga bitirukko.

23Jesus Kristus ko ura kari bo Epaphras, ani agarak talipara kawam ningi bagoso, wore ko den amilmil yawara ni kisiso. 24Ale betela aninga ura suwan Mark, Aristarchus, Demas, se Luke, nuna nunga den amilmil yawara ni kisisan.

25Kari Biya Jesus Kristus ko gomang lila nenengate anirukko. Nunguning.